АТУ жас ғалымы Димаш Тапалов: Президентке таныстырылған студенттік жобадан өндіріске енгізіліп жатқан ғылыми әзірлемелерге дейін

Алматы технологиялық университетінің студенті Димаш Тапалов студенттік жылдарында-ақ болашағынан зор үміт күттіретін жас зерттеуші ретінде танылды. Мемлекеттік ғылыми-техникалық жобаларды іске асыруға белсене қатыса отырып, ол ғылыми-зерттеу жұмыстарын жүргізуге, ғылыми әзірлемелерді дайындауға, сынақтан өткізуге және олардың нәтижелерін таныстыруға атсалысты. Оның ғылыми жолындағы маңызды кезеңдердің бірі – Қазақстан Республикасы Президенті Қасым-Жомарт Тоқаевпен өткен кездесуге қатысуы болды. Аталған кездесуде Азық-түлік технологиялары факультетінің 4-курс студенті ретінде ол Алматы технологиялық университетінің зерттеушілер тобының қатысуымен орындалған ғылыми жұмыстың нәтижелерін Мемлекет басшысына таныстырды.

Қазақстан Республикасы Президенті Қасым-Жомарт Тоқаевтың Алматы қаласының техникалық жоғары оқу орындарының студенттері және жас ғалымдарымен өткен кездесуі барысында Димаш Тапалов Мемлекет басшысына Алматы технологиялық университетінің ғалымдары мен жас зерттеушілері жүзеге асырған «Ұзақ сақталатын қант қызылшасын өңдеу және терең өңдеудің инновациялық технологиялары» жобасын таныстырды. Кездесуге еліміздің тоғыз жетекші техникалық жоғары оқу орнының өкілдері қатысты, олардың қатарында Алматы технологиялық университеті де болды.

Жоба отандық қант өнеркәсібін дамытуға, ұзақ сақталатын қант қызылшасын өңдеу технологияларын жетілдіруге және импортты алмастыру міндеттерін шешуге бағытталды. Бұл ғылыми әзірлеме АТУ ғалымдарының саланы дамытуға және елдің азық-түлік қауіпсіздігін қамтамасыз етуге қосқан үлесі болды. Кейіннен жоба нәтижелері одан әрі дамытылып, жекелеген технологиялық шешімдер өндіріске енгізіліп, өндірістік тәжірибеде қолданылып келеді.

Кездесуді аша отырып, Қазақстан Республикасының Президенті Қасым-Жомарт Тоқаев жас ғалымдар ұсынған ғылыми әзірлемелер мен технологиялық стартаптардың елдің дамуы үшін ерекше маңызға ие екенін атап өтті.