QS өңірлік директоры Сергей Христолюбов АТУ-да 2028 жылғы рейтингтік циклге дайындық стратегиясын талқылады

Алматы технологиялық университетіне QS Quacquarelli Symonds халықаралық рейтинг агенттігінің өңірлік директоры Сергей Христолюбов жұмыс сапарымен келді.

Сапар аясында университет өкілдерімен АТУ-ды 2028 жылғы рейтингтік циклге дайындау мәселелеріне арналған кездесу өтті. Сергей Христолюбов университеттің көрсеткіштері бойынша ақпараттық-талдамалық материалдарды таныстырып, QS халықаралық рейтингтерінің әдіснамасына жан-жақты тоқталды.

Кездесу барысында QS World University Rankings, QS Asia University Rankings, QS World University Rankings by Subject және QS Sustainability Rankings рейтингтерінің негізгі көрсеткіштеріне ерекше назар аударылды. Қатысушылар университеттің рейтингтегі орнына ықпал ететін факторларды, соның ішінде академиялық беделді, жұмыс берушілер арасындағы беделді, ғылыми өнімділік пен дәйексөз келтірілу көрсеткіштерін, халықаралық ынтымақтастықты, білім беру ортасының сапасын, түлектердің жетістіктерін және тұрақты даму мақсаттарына қосатын үлесін қарастырды.

Таныстырылым барысында АТУ көрсеткіштеріне салыстырмалы талдау жүргізіліп, университеттің мықты тұстары мен одан әрі жүйелі дамытуды қажет ететін бағыттары айқындалды. Сонымен қатар халықаралық ғылыми ынтымақтастықты кеңейту, жарияланым белсенділігін арттыру, академиялық қоғамдастықпен және жұмыс берушілермен өзара байланысты нығайту, сондай-ақ университеттің білім беру және ғылыми жетістіктерін халықаралық деңгейде ілгерілету мүмкіндіктері талқыланды.

QS өкілінің сапары кәсіби пікір алмасуға және Алматы технологиялық университетінің халықаралық білім беру кеңістігіндегі орнын нығайтуға бағытталған алдағы қадамдарды айқындауға мүмкіндік берген маңызды алаң болды.

АТУ білім беру мен ғылыми зерттеулердің сапасын арттыру, халықаралық ынтымақтастықты дамыту және университеттің қоғамның тұрақты дамуына қосатын үлесін күшейту бағытындағы жүйелі жұмысын жалғастырады.