АТУ-дың шығармашылық студенттік ұжымдары «JAS GALA» студенттік фестивалінде жүлделі орындарға ие болды.

АТУ тағы бір мәрте дәлелдеді - мұнда нағыз таланттар қалыптасады!

Алматы қаласының ең көрікті орындарының бірі - «Сұңқар» халықаралық шаңғы трамплиндері кешенінің аумағында «JAS GALA» студенттік шығармашылық фестивалінің ауқымды финалы өтті. Теңіз деңгейінен 1000 метр биіктікте шығармашыл жастар көрермендерге өнерге, эмоцияға және ерекше атмосфераға толы ұмытылмас кеш сыйлады.

АТУ студенттері фестивальде жарқын өнер көрсетіп, көрермендердің жүрегін жаулап алды және талант, еңбек пен өнерге деген сүйіспеншілік нағыз керемет жасай алатынын дәлелдеді.

Театр бағыты бойынша «Жарық» жастар театры «Көрермен көзайымы» номинациясының иегері атанды. Олардың қойылымы шынайы эмоцияға, терең мазмұнға және әр көрерменнің жүрегіне әсер еткен кәсіби сахналық шеберлікке толы болды.

Хореография бағыты бойынша Rhythm-X тобы өздерінің қуатты энергиясымен, харизмасымен және ерекше қойылымымен сахнаны дүр сілкіндіріп, беделді «GRAND CREATION» номинациясын жеңіп алды.

Белсенді студент Серікқали Али мобилография бағыты бойынша үздіктер қатарынан көрініп, фестивальдің ең мықты үш қатысушысының қатарына енді.

Бұл жеңістер - АТУ студенттерінің жарқын, талантты, амбициясы жоғары әрі шынайы шығармашыл тұлғалар екенін, сондай-ақ университеттің абыройын қаланың ең ірі алаңдарында лайықты деңгейде таныта алатынын дәлелдейді.