AI және сән: ATU халықаралық конференцияда International Talent Academic and Industry Exchange Conference (Digital Fashion)

АТУ делегациясы Қытай Халық Республикасының Ханчжоу қаласында өткен International Talent Academic and Industry Exchange Conference (Digital Fashion) халықаралық конференциясына қатысты. Халықаралық іс-шараға қатысу кәсіби тәжірибе алмасуға, халықаралық байланыстарды кеңейтуге және білім, ғылым және инновациялық технологиялар салаларындағы ынтымақтастықты дамытуға мүмкіндік берді.

АТУ делегациясының құрамына академиялық сұрақтар жөніндегі проректор Картбаев Т.С. және халықаралық ынтымақтастық департаментінің директоры Алиярова М.Б. кірді.

Іс-шара цифрлық сәнді дамыту перспективаларын, жасанды интеллектіні қолдануды және инновациялық технологияларды өндірістік үдерістерге енгізу мәселелерін талқылау үшін академиялық қауымдастық пен индустрия өкілдерінің басын қосты.

Конференция аясында Картбаев Т.С. Қытай бұқаралық ақпарат құралдарына сұхбат беріп, «Жасанды интеллект + цифрлық сән» бағытының дамуы, цифрлық трансформацияның әлеуеті және Қазақстан-Қытай ынтымақтастығының перспективалары туралы сараптамалық пікірін білдірді.

Білікті мамандарды даярлаудағы университеттердің рөліне, ғылыми-білім беру өзара іс-қимылын дамытуға және білім, ғылым мен өндіріс арасындағы байланыстарды нығайтуға ерекше назар аударылды.

Конференция бағдарламасының қорытынды бөлімі салтанатты рәсімдермен аяқталды: ынтымақтастық туралы келісімдерге қол қою, стартап-конкурстар жеңімпаздарын марапаттау және академиялық серіктестерге сертификаттар табыстау рәсімдері өтті. Zhejiang Garment Industry Association ұйымының Fashion Engineer Innovation & Entrepreneurship Mentor сертификаты Картбаев Т.С.-ға табысталды.

АТУ халықаралық серіктестік байланыстарды нығайтуды және заманауи технологияларды білім беру және ғылыми қызметке интеграциялауға бағытталған бастамаларды дамытуды жалғастыруда.